По свойому
В Радіо Лемко вынятково не буде о Лемковині, бо підеме кус на пілніч, зазриме до братів і сестер з Підляша. А вшытко прото, же Польщу має шансу репрезентувати на Евровізиі підляшскій баунс, значыт Свада і Нічос, зо сьпіванком "Lusterka". Ніка Юрчук і Віктор Щыґєл створили проєкт #INDAWOODS, в котрім лучат електроніку з традицийным сьпівом "по свойому". Думаме, же то прекрасна нагода, штобы Лемкы оповіли по лемківскы о Сваді і Нічос, не лем в контексті музикы, але тіж культуры і языка. Бо вказує ся, же іх выступ на Евровізиі выкликал море коментарів і має величезну соспільну міру. Лемкы з Підляшуками мают дуже веце спільного, як може ся видіти, хоц выводиме ся з іншого місця і зазнали сме іншой істориі, та заєдно стоіме о тото, жебы сохранити культуровы вартости. Черпаме з традицийного джерела, але хцеме, жебы культура жыла і ся розвивала, была актуальна для гнешнього чловека. Як потягнути за собом молоде поколіня і дати йому тото, што гнеска потрібує? Як музика лучыт, а страх перед чуджым выкликує дискусию? Чом артистів вписує ся на "чорну листу екстремістів" білоруского режыму? Выступ Свады і Нічос в Евровізиі то шанса вказати, же Польща і Европа не сут єднородны, же маме превеликє культурове богатство, котре мало бы єднати люди і давати почутя гордости, а не будити непокій і ворогіст. Просиме Вас на проґрам о підляшскім музичнім проєкті, котрий має велику силу, што схылят до передумань над нами як обывателями Польщы, котры можут, але не мусят чути ся Поляками по народности.
- Пуст
- Шмар на листу
- Заприй