Лемківска опера ГОЛОС
В Народовім Форум Музикы во Вроцлаві была премієра лемківской оперы "Голос", скомпонуваной през Дарию "Теклю" Кузяк. Была то велика подія, выняткова на сьвітову міру, адже николи дотепер не дождали сме ся такого рода лемківского твору на сцені. "Голос" то істория двох сестер, котры розлучыла Доля, але Туга не дала ім себе забыти, штобы Памят годна была іх зъєднати на все. То твір, в котрім традиция переплітат ся з клясичном музиком і електроніком, а танец народний зо сучасным. То гнешня форма оповіданя о минувшости Лемків, што лишат з задуманьом над іх бучуністю. О творчім процесі і плянах звязаных з опером оповідают композиторка Дария Кузяк, режысерка Оксана Терефенко-Горощак і дириґент Яков Прибытень.